Frábært framtak hjá hagsmunaraðila eins og Stvfl. Seyðisfjarðar

Ég álít að við fáum engin svör við þessari fyrirspurn. Þetta er frábær hugmynd hjá ykkur Seyðfirðingum að setja þessa fyrirspurn fram og ég hvet ykkur til þess að ýta á eftir svörum. Ég var leiðsögumaður í 11 sumur og kynntist mjög vel slíkum ferðum. Þá er upprunalega stofnað til slíkra ferða til að menn og konur fái að kynnast betur utan vinnustaðar og fundarherbergja. Þarna nær fólk að kynnast persónulega og þar með efla sín tengsl verulega. Þessar ferðir er gríðarlega áhrifamiklar þá sérstaklega þegar við bjóðum erlendum gestum. Náttúran og veiðiskapurinn hefur hálfgerðan töframátt. Hinsvegar fullyrði ég að 80% af þessum ferðum eru keyptar á yfirverðum og á bestu mögulegu tímum. Þá erum við að tala um allt að 6-8 milljónir fyrir 2 til 3 daga veiðiferðir. Stundaskrá þessara ferða (þá 80% þeirra) er hinsvegar það dapurlega. Nú skal ég lýsa henni:

1. Mæting í veiðihús kl. 13, áætlað að hefja veiði kl.16. Menn mæta allir á flottu jeppunum fullir eftirvæntinga. Oft á tíðum eru dregnar upp nýjustu og flottustu veiðigræjurnar sem bjóðast í HEIMINUM. Það gerist ekki flottara. Veiðifærin eru síðan samviskusamlega bleytt kl. 16:30 og allt fer að gerast vítt og breytt um ána, allir veiða fisk.

2. Mæting kl 18:00 á veiðistað X - Happy hour og snafs. Þegar hérna er komið við sögu eru margir gestanna búnir með allt að kippu af öli. Hérna hætta 40% gesta að veiða og halda áfram að kjafta og drekka. Hinir, þessir áhugasömu klára daginn og hætta samviskusamlega kl. 22:00.

3. Kvöldverður kl 23:30. Hérna eru fordrykkirnir í forgang fyrir flesta og menn og konur orðin vel kennd en flestir halda þó haus og haga sér vel. Að mat loknum hefst hið hefðbundna fillerís-partý sem stendur fram á morgun. Kannski þrír hausar af 16 manna hóp er mættur í morgunverð með það í huga að fara veiða daginn eftir. Hinir eru mættir til þess að eiga betri svefn fram eftir degi.

4. Þessir þrír veiða til kl. 11 þegar fjórir aðrir bætast við. Nú er klukkan orðin 13:00 og komið að hádegismat. Þá eru flestir vaknaðir og ætla sér út eftir hlé kl.16:00. Þá gerist nokkuð sérstakt að menn halda áfram að sötra öl og snafsa og þurfa því að leggja sig aftur til kl. 20:00. Þá er ákveðið að halda afstað í veiðina og ná síðasta klukkutímanum.

5. Þá hefst kvöldverður....og sagan endurtekur sig.

Þá er nýtingin á þessum rándýru veiðileifum til veiðimennsku og heilbrigðra samskipta (Sem var til þess gert að efna til betri tengls á milli mann) svona ca.25% af hundraði. Þau samskipti voru líka lungan af tímanum undir áhrifum áfengis.

Þetta er náttúrulega ofboðslega gaman fyrir mjög marga en það sorglega við þetta er að þeim sem er boðið eru oftast ekki veiðimenn/konur heldur mæta í forvitni, vitandi það að þar verður partý. 

Eftir sitja menn og konur sem hafa mikinn áhuga á veiðimennsku og komast ekki að vegna bókanna bankanna og þó að þau vildu gætu þau það ekki vegna þess að verðin eru svo há (en það er einungis vegna góðrar sölumennsku og meðvitundarleysi bankanna í innkaupum).

Almenn skynsemi segir mér að þessi hefðbundna veiði-stundarskrá sé ekki til eftirbreytni fyrir vel gefið fólk og sinni markmiðum bankanna að takmörkuðu leiti. Nema kannski til þess að æðstu menn bankanna séu miklir veiðimenn og nái þannig að veiða á bestu tímum, og það á kostnað bankans.

Hvað væri hægt að gera í staðin fyrir þessar veiðiferðir. Ég tel að ferðir út á land séu svarið. Þar er gist  í 2 nætur og fólki haldið vakandi með allskonar afþreyingu. Gönguferðir, fjórhjólaferðir, snjósleðaferðir, bátasiglingar, hestaferðir og margt fleira. Hafa glæsilegar máltíðir á hefðbundnum matartímum með argandi partý á eftir. Daginn eftir er sofið út og önnur dagskrá hefst kl.13:00. Slíkar ferðir mundi kosta bankana 25% af því sem fer í veiðiferðirnar kosta. Svona ca. 80% þeirra sem taka þátt fá meira úr slíkum ferðum, allavega betra en að sofa af sér rándýr veiðileyfi. Þessir 20% sem gráta, eru bankastjórarnir sem þurfu nú sjálfir að borga fyrir leyfinn sem þeir þurfa nú að berjast fyrir.

Spurt um laxveiðar ríkisbankanna

Athugasemdir

[Sveinn Ingi Lýðsson, 18.12.2008 kl. 08:44]

Tek undir hvert einasta orð hjá þér.  Þekki þetta "bakkasukk" bæði af eigin raun og afspurn.  Ég  hef lent í því að vera inn í hollum í bestu ám landsins þar sem þetta atferli er stundað.  Ruglið, heimskan og plebeahátturinn stjórnar þar atferlinu.  Ég hef átt ásamt félaga mínum nánast heila laxveiðiá út af fyrir mig í tvo daga þar sem handhafar hinna 9 stanganna voru ófærir um að koma út í á sökum drykkju.  Fannst það reyndar frábært nema að sofa í bílnum.  Það var eini kostur okkar, þ.e.a.s. til að geta sofið fyrir, öskrum, músík, píkuskrækjum og öðrum álíka fylleríislátum.

Hér er fullt af fólki sem stundar stangveiði sem íþrótt.  Þetta rugludallalið sem bankar og alls kyns fyrirtæki leiða á bakkana sljótt af vímuefnanotkun spillir orðspori íþróttarinnar í heild.  Þessir rugludallar hafa líka sprengt upp allt verð þannig að allur almenningur hefur ekki átt neinn kost að keppa um veiðileyfin á eðlilegum forsendum.

[Haraldur Haraldsson, 7.1.2009 kl. 22:09]

Samkvæmt svari frá bönkunum ætlar engin af þeim að kaupa leyfi. Húrra....segjum við sem hafa verið úti í kuldanum sl. ár!